نفرين بلوتو للشاعر احمد ورداني

نفرين بلوتو
..
نفرين بلوتو يا ولد ابوى
ولا انت ناوى تروح زحل
الحرف منك غيط كلام
والكلمه بتنقط عسل
بتجر شعرك والوجع
على كوبرى وسط المشترى
شرق الحنين
احمد وردانى اللى بيكتب
بيشق الارض عشان سطرين
وبيرسم احساسه ف صوره
فرحان واحيانا يبقى حزين
ف سطور مرسومه عن الرحله
والباقى اتنين
..
مأمون بركات عبدالستار
تعبان م العيشه وده اقرار
واحلف على مصحف الف يمين
انا عمرى ما شوفته بيضرب نار
واهو عمره بيخلص ف الزنازين
.
صرخة ضمير
ضمير مين اللى كان صاحى
ودم الشهدا
راسم حلمه ع الاسفلت
ومين دلوقت
يتذكر عددهم كام
.
سلامات يا طاهره
يا ام الغناوى والتاريخ
صوت الاذان
ودق جرسك والصليب
وشقاوة الولد البكور
حرق البخور
ونقش الحنه ف كفوف البنات
وطينك الحر الطهور
سر الحياه
وحكايه جوه الكلمتين
.
عطارد تشتكى الزهره
وكلامها صريح
حنينها البكر متعلق
ف توب الريح
كتير يضحك بصوت عالى
لكن جواه حزين مجروح
..
نهاوند صبيه بتتعاجب
ف الكرمه بتخطر تتعاجب
واميرها كريم الاصل يجود
واحمد وردانى قاعد يسمع
ف الخال محمود
والخال محمود
متشعبط فى دلال الحرفين
والقصه اساسها يدوب نفرين
..
من قبل ميلاد النور بزمان
فلاح وبيغرس ف العيدان
متحنى بطين الارض ف قوص
بالطيبه بيسعد كل حزين
الصبح حكاية عشق عنيد
بيزين توبه ف يوم العيد
والفرحه الدايره بتتنطط
حوالين نفرين


ربنا يوفقك ياحمد